У 9-й клінічнай лякарні ёсць лакальная сетка і свой праграміст, але тут таксама дублююць інфармацыю: па-першае, электронная сістэма пакуль не настолькі добра адладжаная, каб адмовіцца ад картак і журналаў, а па-другое — Міністэрства аховы здароўя іх не адмяняла.

У канцылярыі МЗС электронную пошту правяраюць усяго раз на тыдзень.

У пашпартным стале сталічнага ЖЭСу № 38 усталяваныя 2 камп’ютары, на якіх працуюць 4 чалавекі, а ўся папяровая дакументацыя пераводзіцца ў электронны варыянт, аднак новыя дакументы ствараюцца і ў папяровым, і ў электронным варыянтах. Пры гэтым ЖЭС не вядзе электронных архіваў. Інфармацыя толькі ўводзіцца ў камп’ютар, і ўсё.

У мінскай бібліятэцы № 12 каталогі вядуцца таксама ў двух варыянтах, на картках і ў электронным выглядзе — бо ёсць чытачы, якім так зручней.

Камп’ютарная сістэма спраўна працуе на пошце: дадзеныя па падпісках перадаюцца па «мылу», дзейнічае сістэма адсочвання, па якой на ўсіх этапах адсочваюцца і рэгіструюцца перасылкі. Камунальныя электронныя плацяжы даходзяць на наступны дзень, а папаўненне рахунку мабільнага тэлефона — максімум праз гадзіну.